Deputetja më e votuar e PS në Elbasan, Sara Mile, ka ndarë përshtypjet e saj pas pjesëmarrjes në Akademinë Politike, duke e quajtur këtë një “eksperiencë të veçantë” që po u jep të rinjve udhëzime praktike dhe të jetuara nga deputetët me më shumë përvojë.
“Ishte një lloj eksperimenti, të gjithë kishim pikëpyetjet tona si do zhvillohej, çfarë do ndodhte. A do të ishte me të vërtetë një akademi politike ku ne do të ishim studentët dhe ata me më shumë eksperiencë do ishin lektorët. Është një eksperiencë krejt e veçantë, ku ata me më shumë eksperiencë japin disa udhëzime më tepër të jetuara nga vetë ata sesa të lexuara,” u shpreh Mile.
Ajo thekson se ka marrë këshilla që lidhen me rolin e deputetit, qasjen që duhet të ketë brenda dhe jashtë parlamentit, si dhe rregulla të pashkruara të komunikimit publik dhe politik. Një prej këshillave që i ka mbetur më shumë është: “Të mendosh dhe të numërosh deri në 10 para se të kthesh disa përgjigje.”
“Unë jam ende në fillimet e mia dhe shpesh përgjigjet i jap më shumë me zemër sesa të menduara gjatë,” tha Mile, duke shtuar se kjo eksperiencë i ka dhënë siguri në të kuptuarit e rolit të saj si deputete.
Me gjasë, Sarës do t’i duhet të numërojë më shumë se 10 kur t’i vijë radha të jetë në parlament e të gjendet në qendër të debatit politik. Këshillat e Akademisë Politike e kanë çuar në përfundimin se nuk do të jetë në parlament për t’u marrë me Berishën.
Por Sara duket se ka shijuar eksperiencat e ndara nga ata deputetë të PS që kanë më shumë përvojë se ajo. “Ajo që kam shijuar këto 3 javë është ajo që ato me më shumë eksperiencë kanë ndarë me ne: udhëzime, këshilla dhe rregulla të pashkruara në lidhje me rolin e deputetit dhe qasjen që duhet të ketë si brenda parlamentit ashtu dhe jashtë,” – thotë Sara, pa treguar se kush janë këta “ekspertë” që i kanë dhënë këshilla. E duke na lënë hapësirë të mendojmë se ndoshta Elisa Spiropali me shokë e shoqe i kanë mësuar Sarës dhe të rinjve mekanizmat e të bërit politikë në parlament – që në fakt janë mënyra më e shëmtuar dhe më e papërshtatshme për t’u mësuar të rinjve politikën.
Qofshin si Sara, që ende nuk ka dhënë një përgjigje për mijëra votat e marra në Elbasan si anonime, apo qofshin edhe për anonimë të tjerë që do hyjnë në parlament si nxënës të atyre që përfaqësojnë modelin më të deformuar të politikës shqiptare.
