Edi Rama ka nisur një tjetër aksion. Këtë herë kundër ambulantëve që shesin qumësht dhe djathë pa faturë. Dhe nuk e ka keq. Në një vend ku çdo gjë shkon për mrekulli, tashmë lufta pa kompromis duhet të jetë ndaj atyre që guxojnë të thyejnë rregullat e shtetit më vigjilent në Europë. Të shtetit ku çmimi i produkteve ushqimore është nga më të lartët në Europë. Ku një litër qumësht dhe një kg djathë kushtojnë herë më shumë se në çdo kryeqytet tjetër të Europës.
Edi Rama ka vendosur t’u shpallë luftë pa kompromis atyre që guxojnë të shesin e të mbajnë familjet e tyre me produkte bulmeti.
Sepse për të zhvilluar përpara Shqipërinë e për ta çuar në Europë, duhet të blejmë të gjithë në supermarketet e oligarkëve. Atje ku qumështi dhe djathi kanë çmimet më të larta dhe ku cilësia është si në vendet e botës së tretë. Kryeministri ka vendosur t’u japë një standard të ri shqiptarëve.
Atë të ushqimeve me faturë, të pakontrolluara dhe të shtrenjta. Ndoshta dhe për këtë e votuan masivisht në 11 maj. Dhe deri sa të kalojnë dhe 4 vjet, ndoshta gjithçka do harrohet dhe do mësohemi me çmimin e qumështit dhe djathit më të lartë në Europë. Se sa për cilësinë, Edi Rama është kujdesur të shkrijë dhe Inspektoriatin e Kontrollit Ushqimor.
