Ervin Salianji u shfaq sot në mbrëmje në të njëjtën kohë në dy ekrane televizive. Sapo kanë nisur emisionet e së enjtes, ai është dukur “live” në studion e gazetarit Blendi Fevziu dhe në atë të Çim Pekës. Sigurisht që askush nuk dyshon se Salianji ka sozi që e çon në studion paralele. Por me gjasë, në njërën është direkt dhe në tjetrën me regjistrim. Madje pak më vonë gjatë mbrëmjes ai do të shfaqet edhe në studion e Ylli Rakipit.
Se çfarë ka kaq të rëndësishme për të thënë njëkohësisht në tre studio televizive Ervin Salianji, kjo mbetet për t’u parë në vazhdim. Por kjo mënyrë për të marrë vëmendje është aspak profesionale, si për të ashtu edhe për respektin e televizioneve që e kanë të ftuar.
Salianji doli nga burgu dy ditë më parë dhe, ndersa në një konferencë për shtyp ezauroi ato që kishte për të thënë, bredhjet studio më studio për të treguar heroizmat e qelisë dhe servilizmin ndaj kryetarit të partisë janë veç përpjekje të dëshpëruara për vëmendje. Mbetet për t’u parë nëse gjatë mbrëmjes së sotme do të jetë i ftuar edhe në emisionin e Grida Dumës në TCH.
