Prej katër ditësh, Thethi është nën “rrethim”. Në zemër të Alpeve, ku natyra flet me zë të qetë e mikpritja e vendasve është themeli i çdo bujtine, ka zbritur i gjithë shteti: me IKMT e me Polici.
Një aksion i paralajmëruar me zë të ulët, por me fadroma të zhurmshme, që planifikon dhembjen e rreth 70 shtëpizave të drunjta dhe bujtinave, objekte të cilat qeveria thotë se janë pa leje.
Por “pa leje” është vetë shteti në këtë aksion.
Pa ndihmë, pa mbështetje, pa ndonjë investim për vite. Thethi që sot e kësaj dite energjinë elektrike e siguron me gjenerator, kanalizime provizore dhe ujë me burimet.
Një zonë që bukurinë ia fali Zoti, natyra, gjithçka tjetër ne ndërtuar është ngritur me mundin e njerëzve të thjeshtë, që investuan për të mos e braktisur tokën e tyre dhe për të kthyer Thethin në një destinacion turistik.
Sot, me këtë goditje Edi Rama i vë kapakun sezonit turistik të Thethit. Në vend të vizitorëve me çanta, në rrugët e Thethit shihen ekskavatorë.
Në vend të turistëve që ndjekin shtigjet alpine, lëvizin efektivë policie. Në vend të mikpritjes, ka pasiguri e frikë. Bujtinat janë bosh, rezervimet janë anuluar, restorantet po llogarisin humbjet. Turizmit i mbyllet dera në kulmin e verës.
E nëse deri dje Thethi ishte kartolina me të cilën Shqipëria ftonte botën për të zbuluar bukuritë e saj, sot pamjet e Thethit janë kartolina që Edi Rama po i dërgon Veriut, një paralajmërim i heshtur se ky vend nuk u përket më atyre që e ndërtuan me mund, por vetëm atyre që marrin leje nga lart.
Thethi nuk është problem, por simbol. Dhe mënyra si trajtohet ky simbol, është një tregues i qartë. Ndërsa për Veriun, kjo nuk është më thjesht një çështje ndërtimi por panorama se çfarë i pret të nesërmen.
