Një ditë pasi kryeministri Edi Rama zhvilloi takime në bashkinë Durrës, sot të gjithë drejtorët kanë dhënë dorëheqjen. Ndryshe nga bashkitë e tjera kanë paraqitur dorëheqjen edhe kryetarët e njësive administrative. Do të jetë Komisioni i ngritur që do të vendosë se cili do të qëndrojë në detyrë dhe kujt do t’i pranohet dorëheqja. Më 8 Korrik, kreu i qeverisë Edi Rama shkoi në Bashkinë Durrës për një takim me drejtues vendorë dhe me deputetët e qarkut. Gjatë mbledhjes, Rama kërkoi shkarkimin e të gjithë drejtorëve që janë aktualisht në varësi të bashkisë, ndërsa vendimi përfundimtar për largimin e tyre do të mbetet në dorën e kryebashkiakes Emiriana Sako, bazuar në performancën e secilit prej tyre. Në takimin e së martës ishin të pranishëm të gjithë drejtuesit e institucioneve në varësi të Bashkisë së Durrësit, përfshirë drejtorin e Policisë Bashkiake Vasil Copa, drejtorin e Shërbimeve Ardian Ilazaj, drejtoreshën e Buxhetit Valbona Dako, drejtoreshën e Çështjeve Juridike Ani Rroshi dhe drejtoreshën e Burimeve Njerëzore Dhurata Gjoka. Të pranishëm ishin edhe deputetët që po mbyllin mandatin aktual, si dhe ata që pritet të jenë pjesë e legjislaturës së re, Ani Dyrmishi, Etleva Budini dhe Arkend Balla.
