Ervin Salianji doli sot nga burgu pas një procesi të diskutuar si politik dhe që e dëmtoi politikisht duke e lënë jashtë parlamentit që nis në shtator. Edhe pse u mundua të ishte prezent në media gjatë kohës së kryerjes së dënimit, protagonizmi i tij i zakonshëm nuk gjeti shumë vëmendje për shkak dhe të burgosurve të tjerë të famshëm të politikës, majtas apo djathtas.
I lënë në harresë gjatë fushatës nga Sali Berisha që më shumë ka përmendur dhëndrrin e tij se Salianjin, ky i fundit u pa i braktisur sot dhe nga shokët e partisë së tij. Në derën e burgut në momentin e daljes pranë tij u gjend vetëm deputetja Ina Zhupa dhe Luan Baçi. Asnjë deputet tjetër nuk u shfaq as në PD gjatë kohës që ai mbajti një konferencë për shtyp. Madje vetë ish-deputeti i PD përmendi se kishte folur në telefon me kryetarin e partisë dhe kaq kishte mjaftuar për Sali Berishën që mesa duket e konsideron kapitull të mbyllur Ervin Salianjin në PD.
Edhe pse u mundua të ishte në një linjë me Sali Berishën për sa i përket qëndrimit për zgjedhjet dhe “farsën zgjedhore”, Salianji përmendi faktin se PD duhet të bëjë një analizë. Por zëri i mekur i një prej deputetëve më të zhurmshëm të selisë blu, tregoi qartas se tashmë dhe ish-i dënuari politik, siç e quan ai veten, i është bashkuar korit që i mban ison Sali Berishës. Në përpjekje për të “kapur” ndonjë post të mbetur në drejtimin e PD-së duket se dhe Salianji ka hyrë në garën për të qenë i preferuari i Berishës. I cili në fakt nuk është se i ka trajtuar me ndonjë respekt të veçantë të larguarit e fundit nga grupi i Bashës, apo ata që ishin brenda selisë dhe përballë tij në 8 janarin e famshëm.
Nëse dikush ka pritur që Ervin Salianji të ishte një zë i fortë brenda PD-së dhe pse jo antagonist me squlljen e deputetëve përballë humbjes së zgjedhjeve, tashmë i duhet të presë edhe më gjatë se 9 muajt e burgut. Sepse në atë parti gara e vetme nuk është ajo për të qenë të përgatitur dhe fitues përballë Edi Ramës por për t’i pëlqyer Sali Berishës. Dhe këtë garë besnikësh e fitojnë gjithmonë ata që janë servilët më të mirë dhe të përdorurit e mëdhenj.
