Vetëm 25 të rinj kanë mbetur në garë për një nga çmimet më të lakmuara të futbollit për talentet e rinj, “Golden Boy 2026”.
Çmimi, i prezantuar nga gazeta italiane “Tuttosport” në partneritet me “Transfermarkt”, vlerëson talentet më premtuese të futbollit evropian, të cilët janë dalluar me paraqitjet e tyre për klubet dhe ekipet kombëtare gjatë vitit kalendarik.
Për t’u kualifikuar, lojtarët duhet të kenë lindur në vitin 2006 ose më vonë dhe të kenë luajtur në një prej 25 ligave kryesore të Evropës gjatë periudhës së vlerësimit.
Në listën përfundimtare prej 25 lojtarësh, Liga Premier dominon me tetë talente: Ayyoub Bouaddi i Manchester Cityt, Estevao i Chelsea-t, Junior Kroupi i Bournemouthit, Luka Vuskovic i Brightonit, Rayan i Bournemouthit, Myles Lewis-Skelly i Arsenalit, Jorrel Hato i Chelsea-t dhe Charalampos Kostoulas i Brightonit.
La Liga përfaqësohet nga gjashtë lojtarë: Pau Cubarsi i Barcelonës, Yan Diomande i Real Madridit, Marc Bernal i Barcelonës, Endrick i Real Madridit, Jon Martin i Real Sociedadit dhe Xavi Espart i Barcelonës.
Bundesliga ka pesë përfaqësues: Lennart Karl i Bayern Munichut, Said El Mala i FC Kolnit, Konstantinos Karetsas i Borussia Dortmundit, Finn Jeltsch i Stuttgartit dhe Joane Gadou i Borussia Dortmundit.
Në listë janë edhe tre talente nga Serie A: Kerim Alajbegovic i Juventusit, Franco Mastantuono i Fiorentinës dhe Rodrigo Mora i Romës. Warren Zaire-Emery i PSG-së është përfaqësuesi i vetëm nga Ligue 1, ndërsa dy lojtarë nga Superliga portugeze, Victor Froholdt i Portos dhe Gianluca Prestianni i Benficës, plotësojnë listën prej 25 finalistësh.
Lojtari me vlerën më të lartë të tregut në këtë listë është aktualisht Yan Diomande i Real Madridit, i vlerësuar në 120 milionë euro. Megjithatë, Pau Cubarsi i Barcelonës konsiderohet favoriti kryesor për të fituar çmimin. Vlerat e lojtarëve të Ligës Premier mund të ndryshojnë pas përditësimit të ardhshëm të vlerës së tregut nga “Transfermarkt”.
Për përcaktimin e finalistëve është përdorur një sistem vlerësimi i zhvilluar nga “Transfermarkt”. 100 talentët më të mëdhenj të Evropës janë rivlerësuar çdo muaj që prej 20 majit, ndërsa lista tashmë është ngushtuar në 20 lojtarët me rezultatet më të larta, së bashku me pesë talente të përzgjedhur si “wild cards”.
Këtë herë, pesë “wild cards” janë Rodrigo Mora, Franco Mastantuono, Xavi Espart, Joane Gadou dhe Charalampos Kostoulas. Me përjashtim të Espart, i cili është produkt i akademisë së Barcelonës, të gjithë të tjerët u transferuan te klubet e tyre të reja për tarifa prej disa milionë eurosh gjatë viteve 2025 ose 2026.
Fituesi do të përcaktohet tashmë nga një juri ndërkombëtare ekspertësh, e cila do të zgjedhë talentin më të mirë mes 25 finalistëve.
Në vitet e fundit, çmimi “Golden Boy” është fituar nga disa prej yjeve më të mëdhenj të futbollit botëror. Desire Doue triumfoi në vitin 2025, Lamine Yamal në vitin 2024, ndërsa Jude Bellingham e fitoi çmimin në vitin 2023.
