Kryetari i Partisë Demokratike, Sali Berisha, ka reaguar pas lirimit të ish-deputetit demokrat Ervin Salianji nga Gjykata e Fierit, duke e cilësuar burgosjen e tij si një “dënim politik” të orkestruar nga kryeministri Edi Rama dhe ish-ministri i Brendshëm, Fatmir Xhafaj.
“Ervin Salianji vuajti 9 muaj burg pa asnjë faj, jashtë çdo ligji e Kushtetute, vetëm sepse denoncoi Geron Xhafën si trafikant droge në Vlorë. Ky burgim kishte synim të fshihte të vërtetën që Edi Rama, Fatmir dhe Geron Xhafaj përfitonin nga trafiqet drejt Italisë,” deklaroi Berisha në një konferencë për shtyp nga selia blu. Ai shtoi se vonesa mbi 6 javë për vendimin e lirimit ishte “një akt hakmarrës i urdhëruar nga Rama dhe Xhafaj”.
Berisha komentoi gjithashtu situatën në Theth, pas paralajmërimeve të kryeministrit Rama për prishjen e ndërtimeve pa leje, duke e konsideruar si një zhurmnajë për të mbuluar “masakrën mjedisore” që ndodhi në Elbasan me djegien e plehrave për një javë.
“Në vend që të merreshin me masakrën në Elbasan, merren me disa kontejnerë në Theth, për të mbuluar megakrimet e tyre,” deklaroi Berisha. Ai theksoi se qeveria duhej të kishte vendosur një shpërblim prej 1 milion lekësh për kapjen e Prekë Kodrës, të shpallur në kërkim për dosjen “Metamorfoza”, ndërsa akuzoi qeverinë dhe prokurorinë për mosveprim ndaj përgjegjësve të vërtetë.
“Prekë Kodra kishte marrë përsipër të shtyrë nga Vuçiçi këtë histori, dhe sot bëjnë zhurmë me kontejnerët, që sipas raportit të policisë nuk përbëjnë ndërtime pa leje, vetëm për të mbuluar skandalet e tyre,” tha Berisha.
