Në nisje të mandatit të tij të katërt, Edi Rama ka marrë përsipër të luajë edhe rolin e instruktorit të drejtësisë. Pasi është informuar se një prokurore ka ndërtuar një fshat turistik pa leje, ai ka kërkuar marrjen e masave urgjente ndaj saj.
“Kjo prokurore, në vend që të trajtojë një krim mjedisor dhe një krim ndaj pronës publike në një zonë të mbrojtur nga ligji, përsiatet në një justifikim psikik të pashtershëm dhe jep një vendim për mosfillimin e çështjes penale,” tha Rama, duke iu referuar prokurores Gjeli. Sipas kryeministrit, ndërtimi pa leje në zemër të Thethit nuk ka qenë i mjaftueshëm për të hapur një hetim penal. Ai e cilësoi zonjën Gjeli si “kulminacion i një zinxhiri skandaloz vendimesh të prokurorëve” dhe kërkoi nga Ministria e Drejtësisë dhe Këshilli i Lartë i Prokurorisë (KLP) që të marrin masa të menjëhershme ndaj saj.
“Paguhen më shumë se mjekët, mësuesit dhe punonjësit e policisë, dhe tradhtojnë interesat e Republikës me paaftësinë e tyre,” shtoi Rama.
Por edhe nëse kjo që thotë kryeministri mund të jetë e vërtetë, shteti i së drejtës kërkon që çdo veprim të kalojë përmes një hetimi dhe vendimi gjykate. Përndryshe, ç’na duhen prokuroritë dhe gjykatat, nëse gjithçka mund të vendoset nga Edi Rama?
