Jorida Tabaku humbi këtë javë përfundimisht gjyqin ndaj Erjon Veliajt. Pak ditë më parë Gjykata e Lartë shpalli vendimin për konfliktin e hershëm të lindur mes Erjon Veliajt dhe Jorida Tabakut.
Kryebashkiaku i Tiranës, Erion Veliaj e kishte paditur kohë më parë Jorida Tabakun për shpifje, pas deklaratave që kjo e fundit bëri në lidhje me çështjen e Unazës së Re. Në ato deklarata deputetja deklaronte se projekti i Unazës së Madhe është një projekt korruptiv i Veliajt dhe kryeministrit Rama, duke i akuzuar ata për ndryshimin e planit për përfitime personale.
Gjykata e shkallës së parë madje në vendimin e saj i kish kërkuar zonjës Tabaku që krahas përgënjeshtrimit të deklaratës, të paguante edhe një gjobë prej 500 mijë lekësh si dhe shpenzimet gjyqësore e avokatore.
Gjykata e Apelit i dha gjithashtu të drejtë Erjon Veliajt.
Tani Gjykata e Lartë mbylli kapitullin duke e deklaruar zyrtarisht Jorida Tabakun si “shpifëse”. Tashmë deputetja më e votuar e Tiranës do të duhet ta përgënjeshtrojë këtë lajm. Por duket që ajo nuk ka ndërmend ta ndërmarrë këtë hap, për më tepër që Veliaj ndodhet pas hekurave të burgut. Dhe bashkë më Tabakun tashmë hesht dhe kryetari i Bashkisë së Tiranës. I cili në fakt shpërtheu në ekstazë kur fitoi shkallën e parë të gjykimit. Dueti i heshtjes pas “betejave” publike mes Veliajt dhe Tabakut tregon qartë se kohët kanë ndryshuar. E bashkë me to dhe inatet apo aleancat fluide. Kaq të dukshme dhe padukshme këto kohët e fundit. Sepse siç deklaronte vetë zonja Tabaku në shtator të vitit 2021 teksa dilte nga Gjykata për këtë çështje: “kur rron nga shpata nga shpata vdes, kush rron me shpifje, nga shpifja do e pësojë”.
