Kryetari i Partisë Demokratike, Sali Berisha, ka zhvilluar sot një konferencë për mediat nga selia blu, ku nisi fjalën me një urim për Ditën e Pavarësisë së Shteteve të Bashkuara të Amerikës.
“SHBA-të kremtojnë këtë përvjetor pas një fitoreje epike mbi regjimin në Iran të udhëhequr nga Ayatollah Ali Khamenei,” u shpreh Berisha.
Berisha nuk hoqi dorë nga akuzat për zgjedhjet e 11 majit, të cilat i cilësoi si “farsë elektorale”. Ai publikoi video të reja nga disa qendra votimi në Krujë, që sipas tij faktojnë manipulimin e votave. Në videot e publikuara dhe të shpjeguara nga PD, duken raste të votimit familjar dhe patronazhistë që shoqërojnë votuesit deri te kutia e votimit.
Sipas tij, “narkoregjimi përgjoi zgjedhësit me kamera të fshehta në qendrat e votimit”, duke theksuar se PD do të vijojë denoncimet për manipulimet e procesit zgjedhor.
Gjatë konferencës, Berisha foli edhe për urdhrin e kryeministrit Edi Rama për shkarkimin e drejtorëve të bashkisë Vlorë, duke e quajtur këtë vendim si një tjetër “akt të kokave të turkut”.
“Vetëm një parti-shtet asgjëson qeveritë vendore. Shkarkimi i drejtorëve është një tjetër akt që tregon kokat e turkut. Nuk pranojmë kurrë akte të tilla që ndodhin vetëm në Korenë e Veriut. Nuk u tha se çfarë urdhri kanë zbatuar apo nuk kanë pranuar nga kryetari i bashkisë. Marrin urdhra nga kryetari i Bashkisë, jo kryeministri. Po bëj gjithçka për të zbuluar. Drama e Elbasanit, vazhdon djegia e plehrave tek djegësi që Rama ua serviri si kulmin e suksesit, për të cilin mashtroi. Pasi vodhën bashkë me ministrat sollën një teneqe që nuk ka funksionuar një ditë. Tani u thotë shqiptarëve ‘hani kokat e drejtorëve të Vlorës’,” deklaroi Berisha.
