Kryeministri Edi Rama zhvilloi mëngjesin e së enjtes një takim urgjent me dyer të mbyllura në ambientet e Bashkisë së Vlorës. Në takim morën pjesë kryetari i Bashkisë, Ermal Dredha, drejtues të drejtorive vendore, deputetët aktualë dhe ata të zgjedhur në zgjedhjet e 11 majit.
Mbledhja zgjati rreth 90 minuta dhe u karakterizua nga tone të ashpra dhe kërkesa të drejtpërdrejta nga Kryeministri. Sipas burimeve nga takimi, Rama kërkoi shkarkimin e menjëhershëm të të gjithë drejtorëve të Bashkisë së Vlorës.
“Që nga ky moment, të gjithë jeni të shkarkuar. Kryetari i Bashkisë duhet të firmosë menjëherë shkarkimet”, deklaroi Rama.
Kryeministri theksoi gjithashtu se drejtuesit vendorë duhet të jenë në gatishmëri të plotë për zgjidhjen e problemeve të qytetarëve dhe adresimin urgjent të çështjeve që shqetësojnë qytetin.
Ky reagim i fortë vjen ndërsa Vlora përballet me problematika të shumta të pazgjidhura nga administrata vendore, dhe pakënaqësitë qytetare janë shtuar ndjeshëm.
Pas mbledhjes, Rama u pa duke ecur në këmbë në lagjen “Muradie”, i shoqëruar nga Arbjan Mazniku, Pirro Vengu dhe Sinan Idrizi. Ata ndaluan për rreth 30 minuta në një lokal për kafe, para se Kryeministri të largohej nga qyteti.
Në të njëjtën ditë, Klevis Kaso, kandidati për deputet që nuk arriti të futet në listat fituese, u emërua kryetar i Partisë Socialiste në Vlorë, ndërsa deputetja Eriona Ismaili do të jetë bashkëkryetare e kësaj force politike. Këto emërime u komunikuan gjatë vizitës së kryetarit të PS, Edi Rama, në Vlorë.
