Kuvendi i Shqipërisë zhvillon sot seancën e fundit plenare të legjislacionit të 10-të, me nisje në orën 10:00, ku në rend dite janë një sërë projektligjesh të rëndësishme.
Në rendin e ditës është parashikuar shqyrtimi i raportit vjetor të Këshillit Kombëtar të Integrimit Europian (KKIE) për vitin 2024, si dhe miratimi i disa projektligjeve që lidhen me investimet e huaja, rezervat materiale të shtetit, markat tregtare, patentat dhe certifikatat e mbrojtjes shtesë, administrimin e bashkëpronësisë në ndërtesa, si dhe me pushtetet dhe autoritetet e komandimit të Forcave të Armatosura.
Po ashtu, do të shqyrtohet edhe projektligji “Për miratimin e Strategjisë Kombëtare kundër Ndërhyrjeve të Huaja dhe Dezinformimit”.
Ashtu si në seancat e fundit, edhe sot priten debatet për zgjedhjet parlamentare, të cilat opozita vazhdon të mos i njohë, duke i cilësuar si “farsë elektorale”.
Rendi i ditës për sot përfshin:
? Miratimin e procesverbalit të seancës plenare të 26 qershorit.
? Raportin vjetor të KKIE për 2024.
? Akt normativ për disa ndryshime në buxhetin e vitit 2025.
? Projektligje për aderimin në marrëveshje rajonale të kërkim-shpëtimit ajror dhe lehtësimin e tregtisë elektronike.
? Projektligje për investimet e huaja, rezervat materiale të shtetit, markat tregtare, patentat dhe certifikatat e mbrojtjes shtesë.
? Projektligje për administrimin e bashkëpronësisë në ndërtesa dhe për Forcat e Armatosura.
? Diskutime për çështje jashtë rendit të ditës.
Me këtë seancë mbyllet legjislatura aktuale, ndërsa Kuvendi pritet të rifillojë punimet me përbërjen e re pas konstituimit të parlamentit të ri.
