Ka përfunduar procesi i rinumërimit të 586 kutive të votimit në Qarkun e Fierit, pa sjellë ndryshim në numrin e mandateve ndërmjet partive. Megjithatë, rinumërimi solli një përmbysje të brendshme në listën e Partisë Socialiste.
Zegjine Çaushi ka humbur mandatin e deputetes, të cilin e fiton Maldrita Bardho me një diferencë prej 10 votash. Fillimisht, Çaushi ishte shpallur fituese me 61 vota më shumë pas numërimit të 11 majit, por rezultati ndryshoi pas rinumërimit të të gjithë qarkut.
Nisma “Shqipëria Bëhet” e Adriatik Lapaj shpresonte të merrte mandatin e 12 të Partisë Socialiste në këtë qark, por kjo e fundit përforcoi rezultatin me 30 vota të shtuara nga rinumërimi, ndërsa Partia Demokratike thelloi humbjen, me 147 vota që do t’i hiqen pas rinumërimit. Në këtë mënyrë, rinumërimi nuk ndikoi në balancën mes partive, por ndryshoi emrin e deputetes që përfaqëson mandatin e 12-të të PS në Fier.
