Kryeministri Edi Rama u kujtua që të flasë për problemet e buqjësisë duke u shfaqur sot në një tryezë dialogu me fermeët dhe sipërmarrësit në bujqësi dhe blegtori. Me tone dramatike dhe fjalë të stërzgjatura, ia arriti të jepte përshtypjen se ishte i shqetësuar për hallet e fermerëve. Por çuditërisht kryeministri “harroi” të flasë për abuzimin me fondet IPARD nga vetë institucionet shqiptare.
Programi IPARD, një nga mbështetjet më të rëndësishme të Bashkimit Europian për bujqësinë shqiptare, është bllokuar prej më shumë se dy vitesh, pasi hetimet zbuluan shkelje serioze dhe keqpërdorim të fondeve. BE ka kërkuar kthimin e parave, ndërsa Shqipëria mbetet pa akses në një nga burimet më të rëndësishme të financimit rural.
Megjithatë, në vend të reflektimit dhe marrjes së përgjegjësisë, Rama ka zgjedhur të promovojë propagandë. Ish-ministrja e Bujqësisë, Frida Krifca, një nga emrat e lidhur me skandalin, jo vetëm që nuk u shkarkua, por u "shpërblye" me një post si këshilltare në kabinetin e tij.
Ndërkohë që fondet e IPARD përfunduan në projekte luksoze, kompani fantazmë dhe ndërtues resortesh, fermerët shqiptarë janë lënë në mëshirën e fatit, pa subvencione reale dhe pa infrastrukturë për të zhvilluar prodhimin vendas.
Për ironi, i njëti skandal abuzimi me fondet e IPARD përfshiu edhe fqinjin tonë Greqinë. Por ndryshe nga qeveria e Shqipërisë, në shtetin helen u shkarkua ministri përgjegjës dhe zyrtarëve të tjerë, ndërsa kryeministri Mitsotakis është zotuar se hetimi do të shkojë deri në fund.
Prandaj, deklaratat e sotme të Ramës janë vetëm për konsum mediatik, ndërsa pas skenës, dështimet në sektorin bujqësor janë ulëritëse.
