Ish-presidenti Ilir Meta, i ndodhur në paraburgim në burgun 313 që prej tetorit të vitit të kaluar, ka publikuar sot një letër të hapur drejtuar ish-zv/kryeministrit Arben Ahmetaj, i cili aktualisht ndodhet në arrati.
Letra përshkruan me hollësi momentet e arrestimit të Metës, të cilat ai i konsideron një rrëmbim të dhunshëm dhe të paidentifikuar, krahasuar madje me mënyrën si u rrëmbye dikur Aldo Moro në Itali. Ai kujton se personat që e arrestuan ishin të veshur me maska të zeza, pa identifikim dhe pa urdhër-arrest të prezantuar në moment.
“Janë banditë që po përpiqen të rrëmbejnë ndonjë oligark në mes të ditës apo forca speciale që po kërkonin shefin e madh të Sinaloas apo Ndranghetas?”, shkruan Meta me ironi.
Më tej, ai tregon se edhe në komisariat nuk kishte qartësi për urdhrin e arrestit, i cili sipas tij mbërriti vetëm pas më shumë se dy orësh pritje. Ai përmend me ironi edhe faktin se në zyrë i ofruan kafe dhe cigare, duke kujtuar marrëdhënien që kishte dikur me drejtuesit e policisë gjatë kohës kur ishte kryeministër.
Në pjesën e dytë të letrës, Meta flet për jetën e përditshme në burg, duke përmendur vështirësitë dhe kufizimet. Ai tregon se, ndonëse nuk kishte palestër, i lejuan të luante ping-pong – por jo volejboll, me arsyetimin se “është urdhër nga lart për arsye sigurie”.
Megjithatë, edhe mundësia për të luajtur ping-pong iu hoq pas një “shkeljeje” të rregullores – një telefonatë e bërë pas orës 20:00 nga telefoni zyrtar i burgut për një intervistë në një televizion. Për këtë, një komision disiplinor vendosi që ta ndëshkonte me pezullimin e aktivitetit fizik për 10 ditë.
“Më e bukura, Beni – shkruan Meta – ishte kur të nesërmen ma sollën me shkrim vendimin dhe më thanë se mund të ankohesha brenda 15 ditësh, edhe pse ndëshkimi kishte nisur tashmë.”
Meta thotë se së fundmi dhe vizitat me famijarët janë reduktuar, ndërsa për ish zëvëndës kryeministrin ka dhe një mesazh: “
“Po je aktor i madh, sidoqoftë!
E mban mend takimin e fundit, kur erdhe 5 minuta të merrje Dekretin si Ministër për Rindërtimin dhe Pandeminë? Kur më thoshe: ‘Po ti s’e ke idenë sa të do ai, etj. etj.’ Ndërkohë ti e dije shumë mirë që ty të donte edhe më shumë se mua – ndaj ua kishe deleguar firmat e tenderave të tjerëve që atëherë.”
Letra e Metës është shkruar me një ton ironik dhe sarkastik, ku ndërthuret rrëfimi personal me akuza të tërthorta politike, duke e vendosur veten në pozitën e një “të përndjekuri” nga një sistem që sipas tij vepron me selektivitet e pa transparencë. Ai nuk e përmend drejtpërdrejt kryeministrin Edi Rama, por referencat ndaj “bandës së inceneratorëve” dhe thirrjet “Rama ik” në ambientet e burgut lënë të kuptohet se letra është një akt i qartë politik dhe publik.
Ilir Meta ndodhet në paraburgim me akuzat për korrupsion dhe pastrim parash, ndërkohë që Arben Ahmetaj, të cilit i drejtohet letra, është në kërkim ndërkombëtar për çështjen e inceneratorëve.
