Monika Kryemadhi ka akuzuar sekretarin e Përgjithshëm të Partisë së Lirisë, Tedi Blushin, për qëndrime përçarëse dhe sjellje të dyshimta në lidhje me zhvillimet e brendshme të partisë, ndërkohë që kryetari Ilir Meta ndodhet në arrest me burg.
Në reagimin e tij të parë, Blushi ironizoi akuzat duke i marrë me të qeshur gjatë intervistës në Fax News. Ai tha se nuk i ka dëgjuar drejtpërdrejt dhe nuk i beson atyre.
“Kam dëgjuar disa deklarata dhe aludime, por sinqerisht nuk dua t’i marr seriozisht. Nuk besoj se janë të vërteta, as në përmbajtje dhe as në qëllim,” – tha Blushi duke qeshur.
Ai theksoi se Partia e Lirisë po kalon një moment të vështirë për shkak të përndjekjes politike ndaj Ilir Metës dhe se çdo përçarje e brendshme i shërben vetëm kundërshtarëve.
“Nuk jam këtu për të krijuar përplasje personale. Prioriteti ynë është mbrojtja e zotit Meta dhe denoncimi i padrejtësive. Nuk dua të harxhoj energji për ndasi në këtë moment delikat,” shtoi ai.
Nga ana tjetër, Monika Kryemadhi e kritikoi ashpër Blushin, duke e akuzuar se ka larguar nga partia dhe Presidenca bashkëpunëtorët dhe themeluesit kryesorë, si dhe përfshirje në veprime që dëmtojnë figurën e Metës.
“Tedi Blushi mori çfarë mundi: largoi këshilltarët në Presidencë, përjashtoi themeluesit e partisë, e gënjeu për vjehrrin që ende punon nëndrejtor në spitalin e burgut. Deputet u bë, largoi Ilir Metën nga shtëpia, dhe djeg takimet e familjes në burg. Nëse do një fustan apo këpucë me taka, ia jap me qejf,” tha Kryemadhi.
Ajo akuzoi Blushin edhe për mungesë guximi për të folur për figura të tjera politike, duke nënkuptuar se hesht për shkak të pozitës së gruas së tij në administratë.
“Të dalë dhe të flasë për Ergys Agasin, për Ulsi Manjën, ose nuk guxon sepse gruaja e tij punon aty. Ai është i izoluar, ndërsa Meta mbetet një nga të burgosurit më të izoluar, madje dje nuk i lejuan të takohet me djalin. Para se të lexojë deklaratat e SPAK për Kryemadhin, le të bëjë një deklaratë për drejtorin e Përgjithshëm të Burgjeve në Ministrinë e Drejtësisë,” përfundoi ajo.
