Kryetarja e Kuvendit, Elisa Spiropali bllokoi të enjten një kërkesë të opozitës për të futur në debatin parlamentar zjarrin në landfillin e mbetjeve pranë incineratorit të Elbasanit, duke e konsideruar kërkesën e tyre jo në përputhje me rregulloren e Kuvendit.
Të hënën, landfilli i mbetjeve që duhej të përpunoheshin në inceneratorin jofunksional të Elbasanit është përfshirë nga flakët për të disatin vit radhazi, ndërsa administratori i kompanisë publike pretendoi se zjarri erdhi si pasojë e tejmbushjes dhe temperaturave të larta.
Në nisje të seancës së fundit të legjislaturës, disa deputetë të Partisë Demokratike kërkuan që kjo çështje të diskutohej në rend të ditës, duke e konsideruar një ‘katastrofë mjedisore’ dhe duke fajësuar qeverinë për dështimin me inceneratorët.
“Zjarri në fushën e mbetjeve në Elbasan është një alarm për gjendjen dramatike të mjedisit që vjen si pasojë e dështimit spektakolar të inceneratorit, një investim prej 27 milionë eurosh që nuk ka funksionuar asnjëherë siç duhet…” – e nisi fjalën e saj deputetja Zheni Gjergji, por ajo nuk u dëgjua më tej në sallë pasi Spiropali i fiku mikrofonin, duke e cilësuar çështjen si jashtë rendit të ditës.
Edhe deputetja Jorida Tabaku, që ka drejtuar komisionin hetimor për aferën e inceneratorëve, kërkoi që parlamenti të mbajë përgjegjësi për atë që ajo e quajti katastrofë mjedisore.
“Asnjë nga inceneratorët nuk punon dhe Kuvendi duhet të mbajë përgjegjësi, Ministri i Financave duhet të japë llogari përse vijon të paguajë para për inceneratorët,” tha Tabaku.
Kërkesa e Tabakut që të futej në rendin e ditës një debat parlamentar u konsiderua si jo konform rregullores së Kuvendit nga ana e Spiropalit. “Bëni kërkesa sipas rregullores, jo duke u ngritur këtu e të bëni propagandës e radhës,” u përgjigj Spiropali.
Inceneratori i Elbasanit është i vetmi impiant i përfunduar nga tre kontratat e kushtueshme të partneritetit publik-privat të qeverisë shqiptare, të hetuara për korrupsion dhe pastrim parash nga Prokuroria e Posaçme (SPAK). Zyrtarë të lartë, përfshirë ish-ministrin e Mjedisit, janë gjetur fajtorë për abuzime me këto kontrata. Pavarësisht se është i përfunduar, inceneratori i Elbasanit ka pasur vazhdimisht defekte dhe ka punuar vetëm për pak kohë. BIRN gjeti se problemet e inceneratorit krijuan një mal me mbetje që do duhej të ishin djegur./Reporter.al
