Kryeministri Edi Rama ka vijuar edhe ditën e sotme mbledhjet me deputetët aktualë të PS dhe kandidatët e 11 majit, si dhe përfaqësuesit e bashkisë. Ditën e djeshme një pjesë e deputetëve nuk ishin prezent në mbledhjen e djeshme sepse ishin në seancën plenare të Kuvendit.
Në mbledhje kanë qenë të pranishëm edhe kryetarja e komanduar, Anuela Ristani dhe nëndrejtorët e bashkisë.
Ndërkohë, kreu i qeverisë feston sot edhe 61 vjetorin e lindjes. Rama është pritur me duartrokitje në seli, ku bashkëpunëtorët dhe anëtarë të stafit i kanë dhuruar një tufë trëndafila të kuq, simbolikë e së majtës.
Ndonëse nuk ka asnjë deklaratë publike për këto takime, por burime nga brenda mbledhjes së djeshme thanë se kryeministri u ka kërkuar të pranishmëve të dalin në terren të zhvillojnë takime me qytetarë.
Me gjasë kjo është një parapërgatitje për zgjedhje të reja në Bashkinë e Tiranës, duke qenë se kryebashkiaku Erion Veliaj ndodhet prej 6 muajsh në burg. Të paktën këtë tregojnë mbledhjet intensive në një kohë kur politika mbylli sesionin parlamentar dhe përgatitet për pushime, ndërsa Rama i cili siguroi mandatin e katërt vijon mbledhjet edhe në ditën e ditëlindjes.
