Anëtari i KAS Ledio Braho ka komentuar rezultatet e rinumërimit të qarkut të Fierit. Zoti Braho, më shumë se për rinumërimin, duket i shqetësuar për mandatin e Zegjine Çaushin, e cila do të shkojë në Parlament pasi Maldrita Bardho vendosi të heqë dorë nga mandati i saj. Nëse KAS ka si tagër problematikën zgjedhore, Ledio Braho ka shprehur shqetësimin për nivelin e demokracisë në Shqipëri. Në rolin e analistit politik ai është shprehur se është e padrejtë që një kandidat që ka bërë fushatë dhe ka marrë më shumë vota se një kandidat tjetër të mos shkojë në Parlament. Duket se diferenca prej 10 votash që ndau Zegjine Çaushin me Maldrita Bardhon është shqetësuese për anëtarin e KAS më shumë se diferenca prej 671 votash që kandidatja e PD Silva Hasaj i ka marrë kandidatëve të tjerë të partisë së saj.
Anëtari i KAS Ledio Braho është përfaqësues i PD në këtë institucion dhe sigurisht ai në çdo rast do duhet të mbrojë interesat e partisë që përfaqëson. Megjithatë, duhet pak më shumë kujdes për të “qarë hallet” e PD, kur në fakt janë të dy forcat kryesore që e kanë shkelur me dy këmbë procesin e numërimit të votave personale.
Përndryshe, halli i Gazit me Zegjinenë nuk mund të jetë edhe halli i KAS-it me deputeten e ardhshme të PS. Se me kaq shumë publicitet sa po i bëjnë Zegjine Çaushit, duket sikur e gjithë PD dhe KAS kanë vetëm një hall: si ta mbajnë larg Parlamentit 26-vjeçaren nga Roskoveci. Ndërkohë që fakt mbetet se në qarkun e Fierit PD ka shënuar rezultatin më të keq në këto 33 vjet. Vetëm 4 deputetë përfaqësues në Kuvendin e Shqipërisë. Ky duhet të jetë dhe problemi i vërtetë i partisë më të madhe në opozitë. Ndoshta dhe i Ledio Brahos si përfaqësues i saj në KAS.
