Kryetari i Partisë Demokratike, Sali Berisha, i ka dalë në mbrojtje kompanisë “Bankers Petroleum”, e cila është nën hetim nga Prokuroria e Fierit, dhe janë arrestuar drejtuesit e saj nën dyshimet se ka krijuar skema mashtruese në lidhje me TVSH-në, fshehje të të ardhurave, pastrim parash dhe shpërdorim detyre gjatë 20 viteve të fundit.
Në deklaratën për mediat, pas paraqitjes në Prokurorinë e Posaçme, Berisha i quajti mashtrime akuzat e prokurorisë, pasi sipas tij kompania, për periudhën 2006-2013, ka paguar detyrimet. Madje, Berisha tha se në periudhën kur ai ishte kryeministër, “Bankers Petroleum” paguante 60-70% të të gjithë rentës së industrive nxjerrëse në Shqipëri.
“Prokuroria ka bërë një deklaratë. Unë u them shqiptarëve se për periudhën 2006-2013, prokuroria ka mashtruar në mënyrën më të turpshme, sepse kompania ka paguar qindra milionë euro në periudhën për të cilën po flas dhe ka paguar 60-70% të të gjithë rentës së industrive nxjerrëse në Shqipëri. Por kur ka prokurorë gjobvënës si ai që mashtron publikisht, kjo është tjetër punë”, tha Berisha.
Se cila është e vërteta mes pretendimeve të Berishës dhe Prokurorisë, do ta tregojnë hetimet dhe gjykimi. Por çudia qëndron në faktin se, kur kreu i PD-së ka rezerva për akuzat e ngritura nga Prokuroria, atëherë pse nuk bëri një deklaratë për mediat për këtë rast që t’i përgënjeshtrojë?
Por reagimi i tij erdhi me vonesë, një javë pas shpërthimit të skandalit, dhe vetëm pasi gazetarët insistuan ta pyesin gjatë një deklarate për mediat që kishte për qëllim sulmet e radhës ndaj SPAK-ut.
