Kryeministri Edi Rama ka zbarkuar sot sërish në Vlorë, këtë herë me më pak durim. Në një tjetër inspektim “surprizë” në lagjen e vjetër Muradie, kreu i qeverisë nuk i kurseu tonet kritike ndaj kryetarit të Bashkisë, Ermal Dredha, për zaptimin e hapësirave publike nga bizneset private.
“Shiko çfarë ka bërë ky, e ka zaptuar të gjithën. Aty nuk ka më asgjë,” u dëgjua të thoshte Rama, duke treguar me dorë drejt zonës ku dikur kalonin qytetarët dhe sot kalon vetëm aroma e qofteve nga kioskat pa leje.
Vizita nisi me një ndalesë 45-minutëshe në ambientet e bashkisë, ku kryeministri u shoqërua nga ministri i Brendshëm Blendi Çuçi, ministri për Pushtetin Vendor Arbjan Vëngu, dhe një grup drejtuesish lokalë që më shumë dëgjonin sesa flisnin.
Pas bashkisë, Rama u drejtua për të “shëtitur” Lungomaren – ndoshta pjesa më e frekuentuar e Vlorës.
Kërkesa e llogarisë së kryeministrit nuk u ndal me Dredhën. Ai ka paralajmëruar një takim më 9 korrik me të gjithë kryetarët e bashkive, ku në fokus do të jenë problematikat vendore, sezoni turistik dhe – çfarë tjetër – bujqësia, tema e preferuar e Ramës për të kujtuar se fshati ekziston edhe në hartën administrative.
“Kryebashkiakët sikur kanë marrë leje nga fshati dhe s’e kanë ndërmend të kthehen më,” u shpreh ai disa ditë më parë, duke shtuar se është koha për një kthesë – jo me rrotë, por me vizion.
Në rastin e Vlorës, Rama ka bërë disa thirrje që bizneset të lirojnë hapësirat publike, por me sa duket disa ende janë në “pushime” nga zbatimi i ligjit. Sot, me gjasë, kryeministri thjesht u sigurua që mesazhi i tij të mos keqkuptohej – as në letër, as në trotuar.
Nëse në takimin e 9 korrikut do të ketë një “listë të zezë” për kryebashkiakët më rezistent ndaj porosive nga qeveria qendrore, mbetet për t’u parë. Por me gjuhën që po përdor Rama, një gjë është e qartë: humori i tij ka filluar të hollohet bashkë me durimin.
