Reforma në drejtësi ka sjellë rezultate të rëndësishme dhe ka përmbushur pritshmëritë në drejtim të pavarësisë dhe llogaridhënies, duke luajtur një rol kyç në përparimin e Shqipërisë drejt integrimit evropian. Kështu u shpreh ambasadori i Bashkimit Evropian në Shqipëri, Silvio Gonzato, gjatë një deklarate për mediat.
“Reforma në drejtësi ka dhënë atë që pritej nga Shqipëria, sa i përket pavarësisë, llogaridhënies dhe ka dhënë edhe një kontribut shumë të madh për ecurinë e mrekullueshme që ka bërë Shqipëria në rrugën e saj drejt BE,” tha Gonzato.
Megjithatë, ai theksoi se procesi nuk ka përfunduar dhe se ka ende shumë punë për të bërë, veçanërisht në zbatimin konkret të reformës.
“Vazhdojmë të inkurajojmë të gjithë institucionet përkatëse, duke përfshirë institucionet e pavarura të drejtësisë, që të vazhdojnë të punojnë duke pasur këtë synim në mendje,” shtoi ambasadori.
