Kryeministri Edi Rama doli në një komunikim online me ndjekësit në facebook por nuk komentoi mbi situatën e Erion Veliajt, i cili u la në burg nga Gjykata e Lartë. Në vend të kësaj, Rama u ndal te problematika e zaptimit të hapësirave publike dhe te aksioni i qeverisë për lirimin e tyre në disa qytete kryesore të vendit.
“Siç bëmë në Vlorë, do ta bëjmë në Tiranë, në Fier, Durrës, Shkodër, sepse këto qytete kanë marrë hov të madh dhe do të përballen me sfida të reja,” – tha Rama, duke paralajmëruar se nuk do të ketë më tolerim për bizneset që përfitojnë duke zënë prona publike:
“Të bëjnë suksese, fitime, por jo duke zaptuar. Është e papranueshme që Vlora të vajë për një furnizim të rregullt me ujë, që pengohet nga paaftësia. Menjëherë problemi të zgjidhet sapo ndryshon koka e punës.”
Kryeministri paralajmëroi një riorganizim të thellë të administratës dhe vijimin e aksioneve, duke e cilësuar situatën në Theth si një dëm të madh për natyrën dhe imazhin e vendit:
“Vazhdojmë të pastrojmë plagën e tmerrshme që iu hap Thethit. Ministria e Drejtësisë po bën gati dokumentacionin që do t’i kërkojë Këshillit të Lartë të Prokurorisë të qëndrojë mbi Prokurorinë e Shkodrës, sepse realisht është shumë shqetësuese ajo që ka ndodhur. Këta njerëz në shkollë bëjnë një lëndë që quhet logjikë, ndërsa në deklaratën e tyre vetëm logjikë nuk ka.”
Rama theksoi se përpjekja do të shtrihet në të gjithë territorin dhe do të pasohet nga ndryshime në mënyrën si funksionojnë strukturat shtetërore:
“Sot pasdite jemi në Fier dhe pastaj në Durrës, ku do të vazhdojmë të njëjtën përpjekje. Një vetëpastrim dhe vetëqetësim i brendshëm i strukturës. Domosdoshmëri pas një periudhe të gjatë qëndrimi në të njëjtat pozicione të të njëjtëve njerëz, por edhe si rrjedhojë e domosdoshmërisë për ta parë realitetin e qyteteve tona të mëdha si një realitet në transformim të vazhdueshëm. Duhen sy të freskët, duhet një përpjekje e shtuar, një hov i ri, sepse 12 mandate në Fier janë histori, e shkruar nga dhjetëra mijëra mbështetës tanë në zonë e në diasporë, që kërkon të vazhdojë të shkruhet si një kapitull i ri që ka nevojë për më shumë cilësi jete.”
Ai përsëriti se aksioni për lirimin e hapësirave publike dhe forcimin e standardeve të qeverisjes vendore do të vazhdojë pa kompromis, pavarësisht pengesave dhe rezistencës lokale.
