Ish-deputeti demokrat, Ervin Salianji mbajti sot konferencën e tij të parë për mediat, pas lirimit të tij me kusht nga burgu. Në nisje të konferencës ai tha se u burgos prej muajsh për arsye politike dhe se lirimi i tij me kusht erdhi pasi ai kreu 2/3 e dënimit.
Salianji foli edhe edhe për zgjedhjet e 11 majit dhe rolin e PD-së. Sipas tij opozita duhej të gjejë zgjidhje të largojë Ramën dhe regjimin dhe jo të presë që Rama të reflektojë.
Por nevojën për analizë Salianji e sheh vetëm tek sakrifica e drejtuesve dhe simpatizantëve në opozitën e radhës dhe jo tek llogaridhënie e lidershipit të PD, duke u bërë kështu emri i radhës që rreshtohet në heshtjen për t’u zbatuar statuti.
“PD, por sidomos anëtarët e Partisë Demokratike dhe shqiptarët që presin ndryshim, duhet të gjejmë zgjidhje, me cilën formë do largojmë Edi Ramën dhe qeverinë e tij të korruptuar. Ne duhet të gjejmë zgjidhje sesi të largohet qeveria. Partia Demokratike po bën mirë në denoncimin e zgjedhjeve të deformuara. Ne duhet të fokusohemi shumë tek gjetja e zgjidhjeve”, tha Salianji.
Në pyetjen nëse do të kandidojë në zgjedhjet e 2029, demokrati nuk dha një përgjigje konkrete, por theksoi se ai do të bëjë politikë krah interesit të qytetarëve me apo pa mandatin e deputetit.
Gjithashtu Salianji foli për një problem që ka në çështjen e tij. Ai tha se ka një pengesë që sipas tij është mos zbardhja e vendimit nga ana e Gjykatës së lartë.
Ish depiteti tha se Gjykata e Lartë ka bërë falsifikim për të përzgjedhur trupën gjyqësore që shqyrtoi rekursin e tij.
