Komisioneri Shtetëror i Zgjedhjeve pak ditë më parë ka qenë i ftuar në një televizion nga ku ju përgjigj disa pyetjeve lidhur me zgjedhjet.
Sa i takon procesit të votimit të diasporës, Celibashi bëri dy deklarata shumë të rëndësishme.
Së pari ai deklaroi se votimi i diasporës ishte sukses i tij dhe e nënvizoi atë proces si arritjen më të lartë të gjithë karrierës së vet profesionale. Me fjale të tjera, kontrata e lidhur, ngritja e sistemit, krahasimi i shifrave të kthimit të zarfeve, afatet e ndjekura, pjesmarrja dhe procesi i hapjes dhe numërimit të votave të diasporës me vende të tjera, i jepte të drejtë atij për këtë vlerësim për veten. Ky është procesi i votimit të diasporës. S'ka tjetër.
Por nga ana tjetër, pyetjes për kontratën e lidhur me kompaninë DHL dhe pretendimet e opozitës mbi atë proces, Celibashi ju përgjigj se DHL-së i është kërkuar të dorëzojë dokumentacion për zarfet dhe ndërkohë DHL-së nuk i është paguar asnjë lek.
Për hir të së vërtetës edhe kjo përgjigje u shoqërua me të njëjtën krenari profesionale në qëndrim.
Por një pyetje nuk ju bë dot me sa duket Komisionerit Celibashi!
Është pyetje që lind natyrshëm kur dëgjon sesi nga njëra anë Celibashi thotë që votimi i emigrantëve ishte suksesi i tij personal dhe që e konsideron një nga arritjet më të larta të karrierës së tij profesionale, nga ana tjetër thotë që DHL-së nuk i është paguar asnjë lek deri tani.
Procesi i votimit të emigrantëve ishte në 80% të vetin kontrata prej 9 milion euro me DHL. Pra të themi 80% e suksesit të Celibashit i "faturohet" kontratës që faturon DHL.
Tani duhet të bëhemi pak seriozë dhe mos dëgjojmë veresie gjithshka që na thonë.
Ose procesi i votimit të diasporës është sukses dhe si pjesë e suksesit, DHL ka ekzekutuar shumë mirë angazhimin kontraktual, ose votimi emigranteve ishte dështim dhe fajin e ka DHL.
Lidhja e kontratës me DHL gjithashtu u shpall si sukses nga Komisioneri, (personal domosdo).
Por ose është sukses dhe si palë në kontratë Komisioneri duhet të paguajë faturën, ose DHL ka shkelur kontratën duke cënuar procesin dhe duhet t'i refuzohet pagesa.
S'ka nevojë të jesh jurist për ta kuptuar kaq gjë.
Siç nuk mjafton të deklarosh se ndihesh krenar, për t'i bindur të gjithë që është flori gjithë sa nxjerr nga goja.
