Gjatë muajve të fushatës zgjedhore, në rrjetet sociale të kryetarit të Bashkisë Shkodër, Benet Beci, nuk mungonin videot propagandistike nga natyra piktoreske e Thethit. Në dy prej tyre, dallohet qartë edhe “fshati turistik” i ndërtuar pa leje, ngjitur me kishën e zonës.
Ndërtime që, mesa duket, nuk kanë rënë në sy as të kryebashkiakut dhe as të drejtuesve të tjerë vendorë, madje as kur kanë ngritur dronin për të filmuar bukuritë e zonës dhe kioskat aty pranë.
Pas përfundimit të zgjedhjeve dhe nisjes së aksionit “Tokë e Xanun” nga kryeministri Rama, çështja në fjalë, e denoncuar më herët, mori më në fund vëmendjen publike.
Edhe Benet Beci u kujtua të vërë re se në Theth ka një ndërtim në shkelje të ligjit. Në sinkron me kryeministrin, nisi postimet ku kritikonte ndërtimin, fliste për forcën e ligjit dhe kërkonte fajtorët, edhe pse përgjegjësia bie mbi institucionet që ai dhe Rama drejtojnë.
Meqë kryeministri ka qenë në fushatë, po e marrim të mirëqen se nuk e kishte parë këtë ndërtim, paradoksi qëndron tek kryebashkiaku i Shkodrës. Ai jo vetëm që nuk arriti ta ndalonte ngritjen e këtij “fshati pa leje”, por sot sillet sikur struktura është ndërtuar vite më parë, e jo vetëm disa muaj përpara zgjedhjeve.
Madje aq i pakujdeshëm është, pasi videot e publikuara para fushatës, ku Beci paraqet “fshatin pa leje” si pjesë të bukurisë së Thethit, nuk janë fshirë as sot. Në kontrast të plotë me postimet e fundit, ku ai e kritikon të njëjtin ndërtim si të paligjshëm.
Të jetë vallë thjesht pakujdesi nga ana e bashkisë, apo ndërtuesi kishte marrë një “shkelje syri” nga zyrtarët lokalë? Kjo mbetet për t’u zbardhur.
Ajo që dihet me siguri është se Benet Beci dhe Partia Socialiste dolën të fituar, e përdorën ndërtimin për propagandë, morën votat në zonë për të fituar, dhe sot sillen sikur nuk kanë pasur asnjë dijeni duke çuar IKMT-n për ta prishur.
