Përveç aksionit për prishjen e ndërtimeve pa leje, një tjetër aksion i Kryeministrit Rama po zhvillohet, këtë herë në zyrat e administratës së bashkive. Bashkitë e Vlorës, Fierit dhe Durrësit tashmë kanë dhjetëra drejtues më pak, të shkarkuar ose të dorëhequr. Fakt mbetet se aksioni për largimin e tyre mban vulën e Edi Ramës.
Ky i fundit, tashmë në rolin e kryepolicit të hapësirave publike, ka gjetur si përgjegjës për mosfunksionimin e hallkave logjike dhe administrative drejtorët e larguar. Të cilët, as më shumë e as më pak, janë thjesht disa zyrtarë lokalë që zbatojnë politikat orientuese të kryetarëve të bashkive. Këta të fundit, të gjendur përballë presionit të Kryeministrit, nuk kanë komentuar, por kanë vijuar me zëvendësimin e drejtorëve me disa të tjerë që do të marrin rrogën dhe do të vazhdojnë të bëjnë të njëjtën punë.
Administrata lokale, si çdo hallkë e administratës në kushtet aktuale, zbaton porositë e shefave për të mbajtur vendin e punës. Asnjë shkelje e konstatuar zyrtarisht, asnjë vërejtje në rrugë zyrtare, por në mënyrë krejt arbitrare, drejtorë bashkish që ndoshta nuk kanë asnjë lidhje me procedurat për hapësirat publike, sot janë të papunë, për t’iu lënë vendin ca të tjerëve që, me frikën e shtuar, do të bëjnë edhe më pak punë e më shumë përpjekje për të ruajtur vendin e punës.
Në Shqipërinë tonë, administrata punon dhe jeton me aksionet e humorit të Kryeministrit, i cili pasi i vendos, më pas shkarkon drejtorët pa arsye. Të paktën do të ngushëllohen me faktin se nuk bënë konkurse kur morën vendin e punës, dhe partia që i vendos, edhe i shkarkon nga detyra. Jur duhet ta bëjë këtë.
