Kreu i Partisë Demokratike, Sali Berisha, ka zhvilluar sot një konferencë me gazetarët nga selia blu, ku është ndalur edhe te deklaratat e fundit të kryeministrit Edi Rama për një reformë të re territoriale.
I pyetur nëse Partia Demokratike do të ulej në tryezë me Ramën për këtë reformë, Berisha theksoi se opozita nuk e njeh legjitimitetin e Ramës si kryeministër, duke e cilësuar procesin zgjedhor të 11 majit si një farsë.
“Zgjedhjet e 11 majit ishin një farsë. Kjo qeveri nuk ka legjitimitet,” u shpreh Berisha.
Megjithatë, kur u pyet nëse PD do të refuzonte të merrte pjesë në tryezë për një reformë zgjedhore, Berisha u shpreh se Partia Socialiste mbetet pjesë e spektrit politik në vend dhe se reforma zgjedhore mund të diskutohet me të.
“Reforma zgjedhore bëhet nga partitë politike, nuk them që PS nuk është parti e spektrit politik në vend. Me PS mund të ulemi, me qeverinë jo, sepse nuk ka legjitimitet,” deklaroi Berisha para gazetarëve.
Ky qëndrim i kreut të opozitës vjen ndërsa mazhoranca ka paralajmëruar nisjen e diskutimeve për një reformë të re territoriale dhe zgjedhore në muajt në vijim, ndërsa PD këmbëngul për hetimin e zgjedhjeve të fundit dhe rikthimin e standardeve të votës së lirë në vend.
