Kryeministri Edi Rama deklaroi sot se çmimet e reja të referencës për pronat do të shpallen brenda pak ditësh ose javësh, duke paralajmëruar taksa më të lartë për shtëpitë e dyta, veçanërisht për ata që zotërojnë prona në zonat bregdetare.
Sipas Ramës, ky proces do t’u vijë në ndihmë bashkive që të rrisin të ardhurat, pasi shumë qytetarë zotërojnë shtëpi të dyta në bregdet, të cilat do të taksohen më shumë sesa banesa e parë. “Punë ditësh ose javësh, do dalin çmimet e reja të referencës. Ato do kenë një element të ri, që taksa për shtëpinë e dytë do jetë më e madhe sesa për shtëpinë e parë. Bashkitë, sidomos ato të bregdetit, do kenë të ardhura të shtuara nga ky proces,” tha Rama.
Kryeministri theksoi gjithashtu se çmimet e reja të referencës do të rrisin ndjeshëm bazën e taksës së pasurisë, duke i dhënë mundësi bashkive që ta menaxhojnë më mirë dhe të shtojnë të ardhurat e tyre. “Kush do ta menaxhojë taksën e pasurisë mirë, do ketë të ardhura shumë më tepër, sepse ajo është baza kryesore në të gjitha bashkitë e botës,” tha Rama.
Nga ana tjetër, Rama lëshoi kritika të forta ndaj funksionimit të Kadastrës së Vlorës, duke e cilësuar këtë institucion si “simbolin më kuptimplotë të pisllëkut dhe korrupsionit në historinë e shtetit shqiptar”.
Gjatë takimit me kryebashkiakët, Rama kërkoi mbylljen e procesit të legalizimeve brenda mandatit të katërt qeverisës, ndërsa theksoi nevojën për të shmangur “gjelat” në prokurori dhe gjykata, duke iu referuar përplasjes me prokuroren e Shkodrës, Elsa Gjeli.
“Legalizimet duhet të mbyllen, do t’i mbyllim brenda mandatit të katërt. Duhet të marrim përfundimisht legalizimet, s’ka më proces. Duhet të shmangim gjelat në prokurori dhe gjykata që bëjnë lojërat më të çuditshme,” u shpreh Rama, duke theksuar se kush ndërton pa leje apo shtesa mbi shtesa duhet të paguajë shumë shtrenjtë dhe nuk mund të presë që shembja dhe pastrimi të mbulohen nga taksat e qytetarëve.
Rama paralajmëroi se operacionet për goditjen e ndërtimeve pa leje do të vijojnë, ndërsa theksoi se ndërtuesit që nuk respektojnë rregullat nuk duhet të marrin në qafë administratorët e kantiereve. “Goditje për të mëdhenjtë, kufizim për të vegjlit,” theksoi kryeministri.
