Qëndresa Qytetare ka reaguar pas përplasjes së tensionuar mes banorëve të Thethit dhe Inspektoratit Kombëtar të Mbrojtjes së Territorit, gjatë një aksioni për prishjen e ndërtimeve pa leje në këtë zonë turistike.
Situata u përshkallëzua sot, pasi banorët kundërshtuan me forcë shembjen e objekteve të tyre, duke tentuar madje t’i vinin flakën një ure prej druri për të penguar mjetet e IKMT-së. Në konfliktin e krijuar, u përfshi edhe drejtori i IKMT-së, Fatmir Meta, i cili, sipas raportimeve, ka fyer banorët me gjuhë të papërshtatshme.
Në reagimin e saj zyrtar, Qëndresa Qytetare e cilëson situatën si një tregues të degradimit të institucioneve ligjzbatuese, të cilat, sipas saj, po përdoren si instrumente politike. Organizata kritikon veçanërisht praninë e forcave të armatosura me kallashnikovë dhe gjuhën fyese të përdorur nga zyrtarët ndaj qytetarëve.
Organizata shpreh shqetësim për përshkallëzimin e konfliktit dhe bën thirrje për dialog mes palëve për të shmangur pasoja më të rënda. Ajo thekson gjithashtu se aksioni në kulmin e sezonit turistik nxjerr në pah kontrastin mes propagandës për zhvillimin e turizmit dhe realitetit në terren.
Reagimi i plotë
Qendresa Qytetare: Kallashnikovët zvendësuan dialogun në Theth
Aksioni i IKMT në Theth dhe protesta e banorëve po nxjerr dhe njëherë në pah brutalitetin e strukturave ligjzbatuese për menaxhimin e protestave dhe ç’organizimin e organizuar për tu përballur me rezistencën e banorëve.
Prania e policëve me kallashnikovë dhe inspektorë të IKMT që ofendojnë banorët janë dëshmia më e qartë e degradimit të instancave ligjzbatuese dhe keqpërdorimit të tyre për interesa të pushtetit.
Qëndresa Qytetare shpreh shqetësim për situatën e rënduar në Theth dhe kërkon që shteti dhe banorët ta gjejnë gjuhën e përbashkët, para se konflikti të agravojë dhe të prodhojë pasoja më të rënda.
Ky aksin në kulmin turistik dëshnon qartë se turizimi ka mbetur vetëm në gramafonët e propagandës, pasi realiteti në terren nuk përkon me pritshmëritë që kanë turistët.
