Gati një vit më parë, në qershor të vitit 2024 kryeministri Edi Rama në takim me banorët e Thethit foli dhe për zhvillimin e zonës dhe ndërtimet. Ai shpërndau rreth 200 tituj pronësie ndërsa për pronat dhe ndërtimet e tjera premtoi se do të gjendet një zgjidhje.
“Janë gati 200 tituj pronësie, një pjesë e vogël e të cilëve mund të shpërndahen menjëherë. Pjesën tjetër do të mund ta merrni gjatë ditës”, tha Rama para banorëve të Thethit. Sipas tij ishin edhe 90 tituj të tjerë për një pjesë tjetër të zonës. Për 40 prej tyre, është e nevojshme që Bashkia e Shkodrës të bëjë një ndryshim në studimin urbanistik të zonës. “Kjo është një çështje me natyrë ligjore, por jo e vështirë, dhe besoj se ky ndryshim do të përfundohet nga autoritetet brenda muajit shtator”, deklaronte kryeministri një vit më parë. Ndërsa për problematikën që sot është shndërruar në temën e debatit të ditës, ai do të deklaronte:
“Sa i përket 50 titujve të tjerë, problematika lidhet me ndërtimet e kryera në pronat përkatëse jashtë afatit të lejuar nga ligji ekzistues për legalizimet. Natyrisht, do të punojmë për të gjetur një zgjidhje të posaçme për të gjithë ata që ndodhen në këtë situatë, ku pamundësia për të marrë leje ka qenë objektive.”
“Së dyti, është çështja e gjobave. Shumë prej tyre janë vendosur për ndërhyrje ose ndërtime në truallin apo banesat ekzistuese, shpesh të nevojshme për të zhvilluar ekonomi përmes turizmit. Këto ndërtimet nuk janë bërë jashtë vullnetit për të respektuar ligjin, por për shkak të kufizimeve që vijnë nga fakti që zona figuron si zonë e mbrojtur natyrore.”
“Qeveria do të falë të gjitha këto gjoba.”
Me gjasë vetë Edi Rama nuk e mban mend se çfarë ka premtuar një vit më parë në prag të fushatës elektorale. As ai as Benet Beci nuk mbajnë më asnjë përgjegjësi për premtimet dhe as për katandisjen e Thethit tashmë në një zonë që do kohë të marrë veten e t’i rikthehet industrisë së turizmit. Sepse kur është fjala për premtime elektorale, ligji shihet si diçka në duart e Maliqit për të mbledhur vota. Dhe pas zgjedhjeve gjithçka harrohet: që nga certifikatat e pronësisë, zhvillimi i turizmit apo dhe falja e gjobave. Sot gjobën e paguan Thethi dhe banorët e tij.
