Ish-prokurori i Prokurorisë së Përgjithshme, Adnand Kosova, fiton betejën në Gjykatën e Strasburgut.
Pasi e shqyrtoi çështjen e Kosovës, Strasburgu deklaroi se “shkarkimi i aplikantit nuk u tregua proporcional me qëllimet legjitime të ndjekura”.
Sipas Strasburgut, nëse aplikanti kërkon rikthimin në sistem, “do të ishte e përshtatshme të rihapen procedurat e verifikimit dhe të rishqyrtohet çështja në përputhje me kërkesat e Nenit 8”.
Adnand Kosova u shkarkua nga detyra me vendim të Komisionit të Posaçëm të Apelimit, ndryshe shkalla e dytë e vettingut, vendim që tashmë është konsideruar joproporcional nga Strasburgu.
Kosova është prokuror karriere dhe ka ushtruar detyrën në Prokurorinë e Krimeve të Rënda prej dhjetorit të 2004 dhe ka qenë edhe drejtues i këtij institucioni. Në momentin e nxjerrjes jashtë sistemit të drejtësisë, ai ushtronte detyrën e prokurorit pranë Prokurorisë së Përgjithshme.
