Qytetarë dhe aktivistë janë mbledhur këtë të hënë përpara Kuvendit të Shqipërisë, në të njëjtën kohë kur brenda godinës po zhvillohet seanca plenare.
Forca të shumta policie janë vendosur në disa pika përreth Parlamentit, me qëllim garantimin e rendit dhe shmangien e incidenteve gjatë tubimit.
Protestuesit kundërshtojnë qeverinë e kryeministrit Edi Rama dhe kërkojnë largimin e saj. Tubimi para Kuvendit vjen pas protestës së zhvilluar një ditë më parë përpara Kryeministrisë, ku pjesëmarrësit paralajmëruan vijimin e protestave edhe gjatë seancave parlamentare.
Ndërkohë, policia vijon të mbajë nën monitorim situatën dhe ka krijuar një perimetër sigurie në zonën përreth godinës së Kuvendit.
