Një punonjës policie është arrestuar në flagrancë në Prrenjas, pasi dyshohet se ka marrë para për të favorizuar një person që ndodhej nën masën e sigurisë “Arrest shtëpie”.
Agjencia e Mbikëqyrjes Policore, në bashkëpunim me Prokurorinë e Elbasanit, arrestoi inspektorin Çlirim Torra, me detyrë Specialist i Policimit në Zonë pranë Stacionit të Policisë Prrenjas, në varësi të Komisariatit të Policisë Librazhd.
Nga hetimet dyshohet se Torra ka marrë një shumë parash për të favorizuar shtetasin me inicialet A.R., duke i mundësuar atij të shkelte masën e sigurisë dhe të largohej nga banesa.
Ndaj punonjësit të policisë rëndojnë dyshimet për veprat penale “Korrupsioni pasiv” dhe “Shpërdorimi i detyrës”.
Hetimet vijojnë nga Prokuroria dhe Agjencia e Mbikëqyrjes Policore për dokumentimin e plotë të ngjarjes dhe përcaktimin e përgjegjësive të personave të përfshirë.
