Kur filetot e pulës rezultuan me Salmonelë, ministria e Bujqësisë heshti! Kur luleshtrydhet u zbuluan tej normave me pesticide, ministria e Bujqësisë heshti! Kur mandarinat u konstatuan me pesticide të ndaluara, ministria e Bujqësisë heshti! Kur specat u kapën po me pesticide të ndaluara, ministria e Bujqësisë heshti! Nga mishi i pulës me Salmonelë, luleshtrydhet, mandarinat dhe specat me pesticide të ndaluara u shitën tregjeve duke u konsumuar nga popullata pa asnjë lloj ndalese. Të gjitha rastet problematike të produkteve ushqimore të mësipërme u konstatuan nga dhjetori i 2024-ës (për mandarinat) deri në prill 2025 (filetot e pulës, luleshtrydhet), e megjithatë ministrja e Bujqësisë Anila Denaj heshti! Asnjëherë nuk u prononcua për media. Sot, dy muaj pas përfundimit të zgjedhjeve, ministria e Bujqësisë foli. Pezulloi kontrollet e inspektorëve të AKU-së në mbarë vendin. Kërkoi Universitetit Bujqësor të Tiranës rekrutimin e stafit të ri. Dhe e gjitha kjo, sipas ministres u bë vetëm sepse, siç u shpreh vetë "83 mandate për Shqipërinë 2030 janë një barrë për ne, por mbi të gjitha janë një përgjegjësi të madhe për të reaguar më mirë, me shpejtësi dhe për të korrigjuar vetveten. Në reagim të menjëhershëm të kërkesave ligjore por edhe të rritjeve të ankesave të subjekteve kemi vendosur pezullimin e inspektorëve të AKU dhe nismën e ripërtëritjes së burimeve njerëzore të agjencisë në bashkëpunim me UBT". Pra, vijojmë me parullën "Partia mbi të gjitha!" Shqipëria le të presë! Sepse në fakt, teksa AKU nuk do ushtrojë asnjë kontroll fakt është që ushqimet tona nuk do kontrollohen fare. Zero kontrolle, zero monitorim, zero analiza. Presim...që "komisioni prej 5 vetësh me shumicën nga Universiteti, të vlerësojë me shkrim dhe me gojë inspektorët aktualë të AKU-së, si edhe aplikantët e rinj për punë në Agjencinë Kombëtare të Ushqimit",-tha ministrja. Pra, një Katarsis brenda të vetëve. Asgjë për Shqipërinë dhe shqiptarët thjesht ndërrim stafesh. Në vijim, "nga e hëna Kryeministri ka paralajmëruar ndalimin e shitjes së qumështit, mishit dhe prodhimeve të bulmetit pa faturë. Kështu, nga java e ardhshme çdo prodhim i tillë do të sekuestrohet, sepse përbën një kërcënim direkt të shëndetit sidomos me temperaturat e larta dhe subjektet tregtuese do të gjobiten skajshëm"-thotë sërish ministrja e Bujqësisë Denaj. Prej të hënës kushdo që shet bulmet shtëpie apo qumësht fshati do sekuestrohet. Sigurisht, që një masë e tillë, më shumë se kontroll për cilësinë e ushqimeve, kontrolle të cilat mungojnë duket si një masë që orienton blerësin drejt rrjeteve të supermarketeve të mëdha. Për këtë kjo qeveri duket se e ka me shumë merak.
