Kryeministri Edi Rama u ndal këtë të hënë në Sarandë, ku zhvilloi një takim me të rinjtë sipërmarrës të qytetit. Gjatë fjalës së tij, ai foli për evazionin fiskal në sektorin e turizmit dhe prezantoi një skemë të re parapagese për bizneset hoteliere, e cila do t’i lejonte të shmangin kontrollet tatimore gjatë sezonit të pikut.
Rama tha se shumë biznese nuk raportojnë saktë numrin e shtretërve të zënë, çka ndikon në të ardhurat e bashkisë. Ai theksoi se qeveria ka ulur TVSH-në për të nxitur formalizimin, por sipërmarrësit nuk po e shfrytëzojnë këtë mundësi.
“Kemi vendosur t’i japim një opsion strukturave hoteliere: ata që pranojnë të paraguajnë 65% të detyrimeve për periudhën maj-shtator, nuk do të kenë asnjë kontroll tatimor,” deklaroi Rama.
Sipas kryeministrit, kjo masë është më e ulët se shifrat reale, por synon të sjellë një proces normalizimi. Ai shtoi se për bizneset do të ketë edhe një balancë me pagesën e 30% të muajve të dimrit, për të siguruar që stafet të mbahen në punë.
Në përfundim, Rama nënvizoi se qeveria po punon për të krijuar një sistem më të drejtë fiskal dhe për të garantuar që bashkitë të përfitojnë të ardhurat që u takojnë nga turizmi.
