Sali Berisha ka vijuar sulmet ndaj drejtësisë dhe SPAK. Në një takim me të rinjtë e PD-së, ai u ndal gjatë te karakteri dhe përdorimi politik i drejtësisë. “Përgjegjësia jonë është te prokuroria speciale, e cila ndjek penalisht liderët e tre partive kryesore opozitare, në mënyrë identike siç ndodh në vendet e botës së tretë. Kjo prokurori i merr mandatin kryetarit të bashkisë në detyrë, si në rastin Beleri, apo edhe në rastin e Salianjit me dënimin politik ndaj tij,” tha Berisha.
Ai këmbënguli se SPAK mbyll çdo çështje që ka të bëjë me kryeministrin, duke sjellë edhe kujtimet e tij gjatë kohës së diktaturës dhe ngjashmëritë mes prokurorisë së atëhershme dhe prokurorisë speciale.
Kryetari i PD-së premtoi se do të ftojë Komisionin e Venecias dhe institucionet europiane për të rishikuar kompetencat e Prokurorisë së Posaçme dhe për t’i kthyer, sipas tij, drejtësinë e munguar shqiptarëve.
