Loja e Edi Ramës për të provokuar në daljet e tij publike drejtues të partive opozitare ka kaluar këtë herë te drejtuesi i partisë “Mundësia”, Agron Shehaj.
Ky i fundit i ka dhënë përgjigje deklaratës së Edi Ramës se vizita e tij në Mar-a-Lago, vilën e Donald Trump, ishte një xhiro e thjeshtë. Sipas Ramës, vizita e Shehajt në vilën e Trump në Miami ishte njësoj sikur kryeministri të shkonte përpara kullës Trump në Nju Jork dhe të shkrepte foto aty.
“Ej po ky, e patë atë që thoshte ‘po ju flas nga Mar-a-Lago’. Si me shku unë në Trump Tower në Nju Jork dhe të them ‘po ju flas nga Trump Tower, mbështetje e plotë e reformës’ – tha Rama.”
Në një reagim në rrjetet sociale, Shehaj thotë se ka qenë në Mar-a-Lago me ftesë të një senatori amerikan dhe ka marrë pjesë në një tryezë me senatorë, kongresmenë dhe biznesmenë të fuqishëm pranë administratës amerikane.
Në fakt është e ditur botërisht që pjesëmarrja e të ftuarve në Mar-a-Lago, në pjesën dërrmuese të saj, është një bilete që kushton shumë dhe që i paguhet zotit të shtëpisë përmes kompanive të lobimit.
Çdo senator amerikan mund ta presë zotin Shehaj në zyren apo shtëpinë e tij dhe më tej të flasin për çështjet e reformës në drejtësi. Përndryshe, kjo formë “paketimi amerikan” që Agron Shehaj po i bën fushatës së tij, vështirë se mund ta ndihmojë atë vetë në këtë garë.
Veç ish-bashkëpunëtorit të tij të afërt Lulzim Basha, i cili realizoi një foto me Trump në fushatën e vitit 2017, vetë Edi Rama për një foto të tillë hyri në disa telashe juridike dhe jo vetëm me historinë e famshme të gruas së Bilalit. Dikush duhet ta orientojë më mirë zotin Shehaj dhe t’i tregojë se përpjekje të tilla në kohë fushate, pa ftesë zyrtare nga Departamenti i Shtetit, janë qoka të paguara shtrenjtë, pa ndonjë impakt të madh në votat që pritet të marrë më 11 majin e këtij viti.
