Anetarët e PD dhe PS në KAS janë bërë sërish bashkë ditën e sotme, ku kanë rrëzuar kërkesën e koalicionit “Nisma Shqipëria Bëhet”, e cila kërkonte rinumërim në të gjithë qarkun Vlorë.
Ata vendosën që të hapnin vetëm kutinë nr. 4494/00, KZAZ 85 Vlorë pas kërkesës ankimore të kësaj force politike, e cila pretendon se fletët e votimit në këtë qendër nuk kishin vulat.
“Deri në këtë fazë të monitorimit të pamjeve, kemi konstatuar që në kamerat e ZAZ 85 nuk është shfaqur vula e fletës së votimit, duke shkelur parashikimet ligjore të Kodit Zgjedhor sa i takon kësaj procedure.
Kjo e legjitimon drejtpërdrejt kërkesën tonë për rinumërim të plotë të të gjithë qarkut të Vlorës”, thuhet në kërkesën ankimore të Shqipëria Bëhet.
Kjo është hera e dytë që anëtarët e dy partive të mëdha në KAS bëhen bashkë për të rrëzuar kërkesa për rinumërim votash.
