Komisioni i Ankimimeve dhe Sanksioneve (KAS) refuzoi kërkesën e Partisë Demokratike për përjashtimin e anëtarit Ilir Rusmaili nga shqyrtimi i ankimimeve zgjedhore, pavarësisht akuzave të rënda të selisë blu për mungesë paanshmërie dhe sjellje të papërshtatshme nga ana e tij.
Përfaqësuesi ligjor i PD, Marash Logu, dorëzoi një kërkesë zyrtare ku e akuzoi Rusmailin për lidhje politike me Presidentin Bajram Begaj, si dhe për fyerje dhe qëndrime të hapura armiqësore ndaj PD dhe përfaqësuesve të saj. “Anëtari Rusmaili, në pamundësi për të kontrolluar shpërthimet emocionale, degradon në sharje dhe ofendime ndaj nesh,” thuhet në shkresën e depozituar në KAS.
Por kjo kërkesë është rrëzuar nga KAS, duke lënë në fuqi vendimin për praninë e Ilir Rusmailit.
Paralelisht, PD ka hapur tjetër betejë duke kërkuar hetim nga KQZ për zhdukjen e 130.754 fletëve të votimit të papërdorura në zgjedhjet e 11 majit. Në një shkresë drejtuar KQZ-së, PD kërkon hetim administrativ urgjent dhe verifikim të fletëve në të gjitha kutitë e votimit në rang kombëtar.
Sipas të dhënave të përfshira në dokument, KQZ ka raportuar:
3.534.792 fletë votimi të prodhuara; 1.463.204 fletë të përdorura (në kuti); 1.935.834 të papërdorura; 5.000 fletë të dëmtuara.
Por sipas llogaritjeve të PD-së, rezulton një mungesë e pajustifikuar prej mbi 130 mijë fletësh, të cilat nuk figurojnë as në kuti, as të papërdorura dhe as të dëmtuara. “Kërkojmë sqarime të detajuara për vendndodhjen dhe trajtimin e këtyre fletëve. Kjo është një situatë e papranueshme që kërkon veprim të menjëhershëm,” thekson PD në kërkesën drejtuar Komisionit Qendror të Zgjedhjeve.
Opozita e konsideron këtë një tjetër element që rëndon mbi procesin zgjedhor, i cili sipas saj është i komprometuar jo vetëm nga trajtimi i ankesave, por edhe nga mospërputhja flagrante në të dhënat zyrtare për fletët e votimit.
