Mbledhja e radhës e Komisionit të Ligjeve, e zhvilluar sot, është shoqëruar me tensione dhe përplasje të forta mes deputetëve të opozitës dhe kryetares së komisionit, Klotilda Bushka. Debatet u ndezën menjëherë sapo nisi shqyrtimi i rendit të ditës, që përfshinte miratimin e kalendarit të punimeve dhe disa projektligje.
Deputetët Enkelejd Alibeaj dhe Asllan Dogjani kundërshtuan ashpër zhvillimin e mbledhjes, duke e konsideruar procesin jo legjitim pas përfundimit të zgjedhjeve të 11 majit.
“Nuk ka vend për të bërë ligje fallco. Në Shqipëri është instaluar diktatura. Edhe socialistët u përballën me një situatë kriminale,” deklaroi Dogjani, duke akuzuar për manipulim të zgjedhjeve dhe përdorim të parave të drogës në procesin zgjedhor. “Gjatë numërimit u bë manipulim. Kishit çuar jo numërues por artistë,” shtoi ai.
Ndërsa kryetarja e Komisionit, Klotilda Bushka, i kujtoi se “analizën e zgjedhjeve e bëjnë partitë dhe ky nuk është vendi për këtë diskutim”, Dogjani këmbënguli në akuzat për kapje të institucioneve dhe rrezikim të demokracisë.
Në të njëjtën linjë me Dogjanin ishte edhe Enkelejd Alibeaj, i cili deklaroi se pas zgjedhjeve të 11 majit, komisioni dhe maxhoranca nuk kanë më legjitimitet për të miratuar projektligje. “Vetëm diskutime, jo miratime. Çdo vendim duhet të merret nga Parlamenti i ardhshëm,” tha Alibeaj, para se të braktiste mbledhjen së bashku me Dogjanin.
