Kreu i Partisë Demokratike, Sali Berisha, ka hedhur sërish akuza të forta ndaj ish-kryetares së Gjykatës së Posaçme Kundër Korrupsionit dhe Krimit të Organizuar (GJKKO), Irena Gjoka, duke e akuzuar për përdorimin e një kontrate të falsifikuar dhe të panoterizuar, e cila është pranuar si dokument zyrtar në proces gjyqësor.
Sipas Berishës, kontrata në fjalë “turpëron shtetin” dhe përbën një shembull të qartë të kapjes së institucioneve nga korrupsioni. Ai nuk kurseu as ministrin e Drejtësisë, Ulsi Manja, të cilin e akuzoi për mbështetje ndaj Gjokës dhe për përfshirje në veprime të paligjshme.
“Kjo kontratë pa noteri turpëron edhe shtetin e gomarit,” deklaroi Berisha gjatë një konference për shtyp.
Ish-kryeministri shtoi se Gjoka, të cilën e përmendi si “Irena me 5 mbiemra”, prej 15 muajsh po mbrohet nga Prokurori i Përgjithshëm Olsian Çela, ministri Manja dhe Altin Troplini, duke akuzuar këta zyrtarë për mosveprim të qëllimshëm.
“Irena tallet me ta, i poshtëron, sepse këta janë të kapur prej saj për shkak të shërbimeve që u ka bërë. Ulsi Manja fsheh dokumentet, dhe sipas burimeve, ka futur në çantën e tij Louis Vuitton edhe 500 mijë euro ryshfet,” u shpreh Berisha.
Ai përmendi gjithashtu Këshillin e Lartë Gjyqësor (KLGJ), të cilin e akuzoi se nuk ka vepruar brenda afateve ligjore, përkundër faktit që ka në dorë një vulë apostile. Sipas tij, institucionet po përpiqen të transferojnë përgjegjësinë nga njëri te tjetri, në përpjekje për të mbuluar “krimet e Irenës me 5 mbiemra”.
“Kjo është e vërteta e zyrave të narkoshtetit,” përfundoi Berisha.
