Deputetja e Partisë Demokratike, Ilda Dhori, ka akuzuar publikisht drejtuesin politik të PD për qarkun Fier, Gazment Bardhi, si përgjegjësin kryesor për rezultatin zhgënjyes të opozitës në këtë qark në zgjedhjet e 11 majit. Në një intervistë për MCN TV, Dhori ka artikuluar kritika të forta për mënyrën se si u menaxhua fushata dhe u përzgjodhën kandidatët për deputetë.
“Lista e kandidatëve u hartua në kafene”, deklaroi deputetja, duke ironizuar procesin e përzgjedhjes së emrave që, sipas saj, u bë mbi baza klienteliste dhe jo meritokracie. “Në listë kishte njerëz që pinin kafe me Bardhin. Kjo listë nuk i përfaqësonte demokratët e Fierit dhe nuk u ndërtua mbi analiza politike apo me përfshirjen e strukturave në vendimmarrje,” tha Dhori.
Sipas saj, fushata në Fier ishte përjashtuese, pa energji mobilizuese dhe e mbushur me tensione të brendshme, që u reflektuan në terren me një opozitë të dobët dhe të përçarë. “Nuk kishte frymë bashkimi. Pati vetëm përjashtime dhe vendime të njëanshme. Çdo përpjekje për të bashkuar demokratët u minua nga klanet e brendshme,” theksoi ajo.
Dhori nënvizoi gjithashtu se shumë demokratë u lanë jashtë listës dhe jashtë fushatës, vetëm sepse nuk kishin mbështetur PD-në në zgjedhjet e vitit 2023. “U vendosën kritere të mbyllura dhe u favorizuan vetëm emrat e afërt me një grup të vogël njerëzish. Kjo është arsyeja pse opozita dështoi keq në Fier,” shtoi ajo.
Qarku i Fierit, një ndër më të mëdhenjtë në vend, prodhon 12 mandate parlamentare, nga të cilat Partia Demokratike arriti të siguronte vetëm 4 – një rezultat që Dhori e quan të papranueshëm dhe pasojë direkte e menaxhimit të gabuar nga Gazment Bardhi.
