Katër kandidatë të Partisë Demokratike, Ilir Alimehmeti, Mimoza Hajdarmataj, Lisandër Hoxha dhe Aulon Kalaja, janë rrëzuar nga Komisioni i Ankimimeve dhe Sanksioneve (KAS), në përpjekjen e tyre për të kërkuar rinumërimin e votave preferenciale në listat e hapura të qarkut Tiranë. Vendimi u mor me shumicë votash 4 me 1, ku vetëm anëtari Ilir Rusmali votoi pro legjitimimit të kandidatëve si palë ankuese.
Sipas shumicës së anëtarëve të KAS, kandidatët individualë nuk kanë të drejtën ligjore për të paraqitur kërkesë për rinumërim, meqenëse një e drejtë e tillë i përket vetëm subjektit politik që i ka propozuar. Këtë qëndrim e mbështetën përfaqësuesit Bele dhe Lako nga Partia Socialiste, si dhe përfaqësuesit Braho dhe Çefa nga Partia Demokratike, të cilët argumentuan se është vetëm partia ajo që mund të depozitojë një kërkesë ankimore të tillë.
Kërkesat ishin bërë zyrtarisht nga vetë kandidatët, pas përfundimit të procesit të numërimit dhe publikimit të rezultateve, ku sipas tyre ka pasur mospërputhje në numrin e votave preferenciale të shënuara dhe të regjistruara.
