Kandidati i listës së hapur të PD në qarkun e Durrësit, Aulon Kalaja, ka depozituar në Komisionin Qendror të Zgjedhjeve një kërkesë zyrtare për rinumërimin e votave në këtë qark, duke ngritur akuza të forta për trafikim dhe deformim të votës.
Kalaja thotë se gjatë këqyrjes së pamjeve filmike ka konstatuar parregullsi që sipas tij përbëjnë trafikim votash dhe keqpasqyrim të të dhënave në procesin e numërimit. Ai kërkon nga KQZ që t’i vihet në dispozicion koha e nevojshme për analizimin e plotë të pamjeve filmike, me qëllim përgatitjen e plotë të ankesës për shqyrtim.
Në kërkesën e depozituar më 26 maj, Kalaja shprehet:
“Gjykojmë se pretendimet tona janë evidentuar dhe premisa e shkeljeve është vendosur, pasi është konstatuar motivi i keqpasqyrimit të të dhënave. Nëse nga ana juaj do të pranohej në mënyrë të menjëhershme hapja dhe rinumërimi i kutive, atëherë do të ishte e panevojshme që të na ngarkohet barra për të këqyrur çdo pamje filmike.”
Ai rezervon të drejtën që deri në ditën e shqyrtimit të kërkesës të paraqesë pretendime dhe argumente shtesë, përfshirë edhe ato që lidhen me legjitimitetin e procesit.
Kalaja shprehu publikisht pakënaqësinë për rezultatet e zgjedhjeve të 11 majit, ku sipas të dhënave zyrtare të KQZ-së, ai mori 7291 vota, duke u renditur i dyti në listën e opozitës në qarkun Durrës. Mandati i vetëm nga kjo listë i shkoi ish-prokurorit Arian Ndoja, me 8249 vota.
“Unë nuk i njoh njerëzit që më kanë votuar. Kam thënë që telefonin tim ta venë në përgjim, të shohin nëse kam blerë vota. Këto janë vota të pastra. Ma kanë trafikuar votën brenda kutisë dhe për këtë do bëj kallëzim. Krimi është brenda kutisë dhe do ta çoj çështjen në prokurori,” deklaroi Kalaja pas zgjedhjeve.
KQZ ka miratuar më 24 maj tabelën përmbledhëse të rezultatit për qarkun Durrës, por Kalaja argumenton se procesi është i kontestuar dhe ka ndikuar në ndarjen e mandateve. Ai kërkon hetim administrativ të procesit dhe rinumërim të plotë të votave në zonën zgjedhore.
