Deputetja e PS, Edona Bilali, në oborrin e parlamentit ka komentuar për mediat, spotin që bëri bujë në fushatën zgjedhore, ku një i moshuar shfaqej në spital duke u shprehur se nuk do vdiste pa e votuar atë.
Pas reagimeve dhe kritikave të shumta që mori, Bilali u detyruar ta fshinte nga rrjetet e saj sociale. Por edhe pse u detyrua ta hiqte, ajo sot në daljen e parë për mediat në vend që të kërkonte falje për mesazhin që transmetoi, u mundua ta justifikonte duke thënë se qytetarët ende nuk janë gati për këtë lloj humori.
“Ai nuk është një i moshuar, ai është një aktor humori. Por mendoj që qartësisht në Tiranë dhe kryesisht jashtë Shkodre nuk janë akoma gati për këtë lloj humori” – u shpreh Bilali.
Meqenëse sipas deputetes të PS që nuk mundi të siguronte një mandat tjetër në parlamentin e ardhshëm, qytetarët nuk kuptojnë humorin, herës tjetër të mendojë ndonjë spot më etik dhe më të kuptueshëm. Atëherë ndoshta siguron dhe karrigen që do i mungojë për 4 vitet e ardhshme.
