Gjykata Kushtetuese ka vendosur të rrëzojë kërkesën e Partisë Demokratike për mandatin e deputetit socialist Vullnet Sinaj, duke i dhënë fund një beteje ligjore që nisi më 5 mars. Demokratët kërkonin shpalljen si të papajtueshme me Kushtetutën të vendimit të Kuvendit të datës 30 janar 2025, ku u votua kundër dërgimit në Kushtetuese të mocionit për shqyrtimin e mandatit të Sinajt.
Në qendër të pretendimeve të opozitës qëndronte akuza se deputeti socialist ka përfituar përmes kompanive të tij rreth 36 mijë euro nga buxheti i shtetit, gjatë kohës që ushtronte mandatin parlamentar. Kërkesa e PD, e firmosur nga 14 deputetë, bazohej në të dhëna që sipas saj tregonin qartazi shkelje të ligjit për papajtueshmërinë e funksionit të deputetit me përfitime financiare nga shteti.
Në një mbledhje të Këshillit të Mandateve, Gazment Bardhi deklaroi se “vetëm përmes 9 transaksioneve të verifikuara, kompanitë ku Vullnet Sinaj është aksioner apo pronar, kanë përfituar gjithsej 3.68 milionë lekë nga fondet publike.” Sipas Bardhit, pavarësisht se subjektet figurojnë me status pasiv, përfitimet nga aksionet kanë vazhduar.
Nga ana tjetër, vetë Vullnet Sinaj ka mohuar kategorikisht akuzat, duke i cilësuar si “një farsë të madhe dhe qesharake”, të motivuara politikisht.
Kërkesat e PD drejtuar Gjykatës Kushtetuese përfshinin:
1.Zgjidhjen e konfliktit të kompetencave ndërmjet Kuvendit të Shqipërisë dhe 1/10 së deputetëve që ngritën mocionin.
2.Shpalljen si antikushtetues të vendimit të Kuvendit për mosdërgimin e mocionit në Gjykatën Kushtetuese.
3.Detyrimin e Kuvendit për të dërguar mocionin në Kushtetuese për shqyrtimin e papajtueshmërisë së mandatit të Sinajt.
Pas shqyrtimit të kërkesës dhe argumenteve të palëve, Gjykata Kushtetuese vendosi rrëzimin e kërkesës së Partisë Demokratike, duke e lënë në fuqi vendimin e Kuvendit dhe duke i dhënë të drejtë shumicës parlamentare për mosdërgimin e çështjes për interpretim në Kushtetuese.
