Mandati i fundit i Partisë Demokratike në qarkun e Durrësit që i përketë listës së hapur, mesa duket është kthyer në një tjetër betejë mes kandidatëve të kësaj force politike edhe pas përfundimit të procesit të numërimit.
Pretendime ka shfaqur edhe kandidatja për deputete Andia Ulliri, e cila ka depozituar në Komisionin Qendror të Zgjedhjeve një kërkesë, ku shprehet se mandati që i ka kaluar kandidatit Arian Ndoja është në shkelje të dispozitave të Kushtetutës dhe Kodit Zgjedhor. Në kërkesën e saj, Ulliri pretendon se në listën fituese të PD që ka shpallur KQZ për qarkun e Durrësit, nuk janë respektuar kuotat gjinore.
Sipas saj, KQZ nuk ka interpretuar siç duhet dispozitat e Kodit Zgjedhor, pasi në bazë të kuotës gjinore që 1 në 3 deputetë duhet të jetë nga gjinia më pak e përfaqësuer, asaj i takon mandati nga lista e hapur e PD.
“Siç dhe shihet qartë nga ana e legjislatorit Kuvendit të RSH dhe GJK kuptohet qartë që kemi të bëjme vetëm më një listë dhe si e tillë nga ana juaj është detyrimi ligjor që të zbatohet përcaktimi kushtetuese për përfaqësimin gjinor si dhe zbatimin e Kodit Zgjedhor i cili e detyron komisionerin që 1 në 3 emra të jenë nga gjinia më pak e përfaqësuar, do të thotë që në listën e subjektit zgjedhor Partia Demokratike - Aleanca për Shqipërinë Madhështore në Qarkun e Durrësit do të duhet që nga ana juaj ky mandat të më jepët mua si më e votuara nga kandidatet e gjinisë më pak të përfaqësuar” – shprehet ndër të tjera në kërkesën e depozituar në KQZ.
Kujtojmë se Ulliri nuk është e vetmja që kërkon t’i marrë mandatin e deputetit kandidatit Arian Ndoja.
Pretendime ka shfaqur edhe kandidati tjetër i kësaj liste, Aulon Kalaja, i cili ka pretenduar se votat e tij janë tjetërsuar gjatë numërimit. Për këtë ai ka marrë edhe pamjet filmike të qendrave të numërimit të votave, për të verifikuar votat preferenciale. Ai gjithashtu është shprehur se nëse do të konstatojë parregullësi, do të kallëzojë në SPAK personat e përfshirë.
