Kreu i Partisë Demokratike, Sali Berisha, ka reaguar ashpër pas zgjedhjeve të 11 majit, duke akuzuar kryeministrin Edi Rama se po përpiqet të ndikojë në përmbajtjen e raportit të komunitetit ndërkombëtar mbi procesin zgjedhor. Berisha pretendon se Rama po paguan “shuma të jashtëzakonshme” dhe po zhvillon “telefonata të pafundme” për të ndryshuar përceptimin ndërkombëtar për zgjedhjet.
“Sikundër shpreh bindjen dhe besimin tim se raporti i komunitetit ndërkombëtar, kundër të cilit Edi Rama po paguan shuma të jashtëzakonshme për ta ndryshuar, nuk do të manipulohet. Telefonata të pafundme, por nuk do t’ia arrijë. Raporti do të jetë pasqyra më e vërtetë e kësaj farse për të cilën fjalën do e kenë shqiptarët,” deklaroi Berisha.
Ai shtoi se mijëra qytetarë e konsiderojnë Edi Ramën si “armikun e betuar të votës së lirë” dhe nuk do t’i falin kurrë, siç e quajti ai, “farsën elektorale”.
Ndërsa komentoi festën e organizuar nga Partia Socialiste për fitoren në zgjedhje, Berisha e përshkroi atë si “një ceremoni të zymtë dhe të frikshme”, ku, sipas tij, mungonin buzëqeshjet dhe emocionet e sinqerta. Ai akuzoi drejtuesit e PS-së si të lidhur me botën e krimit dhe cilësoi parlamentin e ri si një “narkoparlament”.
“Parlamenti i ri është produkt i një skenari kriminal, i ngjashëm me ato që shihen vetëm në filmat për botën e errët të mafias,” përfundoi ai.
